Glæsilegt mentorkvöld FKA Framtíðar á Vinnustofu Kjarvals.

Konur eru konum bestar – Glæsilegt mentorkvöld FKA Framtíðar

Á dögunum fór fram upphafsviðburður árlegs Mentorverkefnis FKA Framtíðar, sem er deild innan Félags kvenna í atvinnulífinu, en þetta er í sjötta sinn sem það er haldið. Viðburðurinn fór fram á Vinnustofu Kjarvals og mættu um 60 konur úr íslensku atvinnulífi. 

„Mentor verkefnið gengur út á að koma upp mentor samstarfi milli reynslumikilla stjórnenda og reynsluminni framtíðarleiðtoga. Þetta verkefni hefur verið virkilega vinsælt og mjög mikilvægt til að efla tengslanetið og til að læra hver af annarri. Mentor verkefnið í ár er eitt það stærsta frá upphafi og eru um 90 konur búnar að skrá sig til þátttöku. Með þessu verkefni viljum við brúa bilið og efla tengslin á milli beggja hópa og hvetja konur til að standa saman og hjálpa hvor annarri að ná árangri“ segir Thelma Kristín Kvaran, formaður FKA Framtíðar.

Stjórn Framtíðar 2022-2023 á Kjarval: Árdís Ethel Hrafnsdóttir, Bergrún Lilja Sigurjónsdóttir, Karlotta Halldórsdóttir, Sigríður Inga Svarfdal Þorkelsdóttir, Sólveig Ragnheiður Gunnarsdóttir og Thelma Kristín Kvaran formaður. Á mynd vantar Önnu Björk Árnadóttur.

Eru íslenskar konur að heltast úr lestinni?

Á viðburðinum fengu þátttakendur að hlusta á stutt erindi frá Sif Einarsdóttur, meðeiganda hjá Deloitte, en hún skrifaði íslenska hluta skýrslu Deloitte „Women in the boardroom“, sem kom nýlega út í sjöunda sinn. Sif setti fram spurninguna: “Eru íslenskar konur að heltast úr lestinni?” en Belgía, Frakkland og Ítalía hafa öll náð hærra hlutfalli kvenna í stjórnum og stjórnunarstöðum en Ísland. 

Þá tók Alda Sigurðardóttir, framkvæmdastjóri mannauðssviðs hjá Sýn og stjórnendamarkþjálfi, til máls og kynnti mentorverkefnið fyrir þátttakendum. Alda hefur, undanfarin ár, veitt FKA Framtíð ráðgjöf við framkvæmd þessa verkefnis og gefið þátttakendum nauðsynleg verkfæri til þess að fá sem mest út úr því.

Því næst fór fram hið sívinsæla hraðstefnumót milli mentora og mentee þar sem hver og ein fékk eina mínútu til að segja frá sjálfri sér, eða fara með ,,lyfturæðuna”. Í framhaldi af því verða konurnar svo paraðar saman og munu þær eiga reglulega fundi á næsta ári sem lýkur með lokahófi í apríl. 

„Það er ómetanlegt fyrir ungar konur, sem eru að stíga sín fyrstu skref eða eru komnar í stjórnendastöður og vilja taka skrefið enn hærra, að geta leitað til öflugra leiðtoga um leiðir til árangurs og fengið ráð um ýmislegt í tengslum við það sem þær eru að takast á við í sinni vegferð. Ég tók þátt í þessu verkefni fyrir nokkrum árum síðan og fékk alveg frábæran mentor sem hjálpaði mér mjög mikið og er ég henni ævinlega þakklát. Sömuleiðis vona ég að ég hafi gefið jafn mikið af mér til hennar. Það er mikilvægt að konur horfi ekki á hvor aðra sem samkeppnisaðila heldur samstarfsaðila. Við þurfum að vinna saman í að fjölga konum í stjórnunarstöðum, við þurfum að vekja athygli á konum sem eru að gera vel og gefa frambærilegum konum tækifæri. Saman erum við sterkari“ bætir Thelma við að lokum. 

Frekari upplýsingar: formaður FKA Framtíðar Thelma Kristín Kvaran s. 6907643

M Y N D A S Y R P A // Ljósmyndir Þórhildur Stefánsdóttir

@Árdís Ethel Hrafnsdóttir  @Bergrún Lilja Sigurjónsdóttir @Karlotta Halldórsdóttir @Sigríður Inga Svarfdal Þorkelsdóttir @Sólveig Ragnheiður Gunnarsdóttir @Thelma Kristín Kvaran formaður @Anna Björk Árnadóttir #FKA #FKAkonur #Hreyfiafl #Sýnileiki #Tengslanet #FKAframtíð // Ljósmyndir: @Þórhildur Stefánsdóttir